Вахтар ва инсанар

Мейлан Нежефов

ЦIиб улихьна йисари ихь абйир-бабари хьадну ва чвлин вахтна апIури

гъахьи саб жерге ляхнар-крар, гьяйифки, гъи ихь арайиан гъирагъдизди

гъягъюра. Магьан Гьямидова Сягьибат бабан ктитбариан сакьюдар гафар-

чIалар жикъиди тувраза.

Хьадну мал-къарайиз укI-кIаж апIбалан кьяляхъ, учу архаинди шулдайча.

Беълириз, чайран укIариз гъяру йигъариз бизар дарди ккилигури, уч апIури

ва машквран йигъарси дурар къайд апIури раси бахчириъ, дишариъ далдабу

зурнайиин сеснахъди адауйча.

Чвлинган кIуруш, фургъанди кьюрдуз рузи уч апIури ярхи йигъ дарпи

чIурариъ яр-йимиш уч апIури ахьну шуйча, башаг гади хал-йишв, бай-

ришкьан дярякъри. Жвуван багъ-бахчайиъ кибнайи картуф ктIибкIури, вич-

жихир убтIури, шубуд йигъан хъади-хъади уч гъапIу чимларикан уруб апIури,

харан чинчар, гъяни чинчар, хамсар, кьюрдун урхьар, гъимгъар яни фуну

бабат яд уьлкейиъ ашра дабгну убтIури, эвел апIури халкьар чIурариан тап

кьамкьрихъди йиф дабхъайизкьан кам шулдай. МикI-хьар гъабхьиган мучIуди

амиди хифран гьарариккна адахьуйи. Яни гьаригъ чIуру вичкьан гъитурдайи

кьюрдну малариз кIури. Гъубкку малин ликаркьан гатахьурдайча кьюрдуз,

эбелцназ гъухьу дяхин апIуз кIури фикриъ ади, жан бай. Гьадмукьан халкьдиз

варибдин гъадриъ ади, сар-сарихьна вуйи гьюрмат дюбхну, даршлуриз

гъирагъдилан кюмек дапIну, йизуб-явуб дарпиди, сир-мясляаьтниинди

яшамиш шуйи. Саб гафниинди, шадвал айи, шадвал пай апIуйи, шадвал пай

апIуз аьгъяйи.

Хъа гъи ухьуз му ляхнар сабкьан гьяспикк ккамдархьуз. Ав, саб терефнаан

фикир гъапIган белки гьаддикан рукар-кюлеризра ашкара шулашул. Гьаз

гъапиш, йислан-йисаз гьараригъ гъиршрайи йимиш-тахилин кьадара цIиб,

кьит шули а. Хифар, чимлар кьюд-шубуд йис гъидипури гъиршритIан амдар.

Ич вахтари ивнарикк, гъваин шюмгъликкди тIурниин алаънайи жихрар, гъах

апIуз кирхнайи йииккар, ригъ тувуз гъваин дивнайи гугар… Гьей, вахтар ва

инсанар, шюкюр ибшривуз первердигар, шюкюр ибшривуз.

Му ляхнар йислан-йисаз кьит шули а. Халкьдиз лихуб, зегьмет зигуб ккунди

амдар. Ич вахтна урчIвур-йицIур велед ади, гаш`вал, дарвал ашра мукьанди

ктIерццбар адайи. Гъулануб, жвуван хиларилантина вуйиб дирипIри,

ишлетмиш дарапIри, зегьмет дизригри, зегьметнан ляхин цIиб шпахъ, чпин

жандиз наан адру чиркинвалин уьзрара артухъ шула, йиз фикриан. Гъулан

кьялаъ ади, гьяфтайи саб ражну шагьриз душну фунуб вушра гъадабгъну гъюз

гъи мумкинвал, мюгьлетвал а. Хъана шюкюр ибшривуз первердигар. Адар-

дар кIурур, тек-бирра рякъюри адарзуз, айиш миликина му багълар-бахчир

мици шулдай. Гъит хъана бул ибшри чпиз, абйир-бабарин, лихурайи касарин,

уьлин кьацIран гъадри ибшричвуз, жан баяр-шубар!

Ич сюгьбатнан аьхириъ Сягьибат бабу, ЧIири гъул`ан вуйи рягьматлу

Салмахан мялимдин гафар кIваин гъапIнийи: «Миннат вуйиз жигьилариз,

Гьюрмат апIуз ипIру уьлиз. Алалабхъри гьич учв ляхин, Уьл адарди

варжйириин!»

Гъит, ихь ляхин уьл адарди варжйириин, хачариин алалабхъри гьич саб

вахтнара. Ризкьдихъ, имандихъ уву мягьрум мапIан первердигар!